قصيدة قبل الوداع

قبل الوداع

قبل ما تقول وداع تقسى و تفارقنا
وتنسى دنيانا وتهجر عش محبتنا
كان مفروض عليك تشاورنا
أو حتى بالكلام كان تحاورنا
تعلن عن دواخلك وبيها تصارحنا
عشان تعرف إيه حقيقة مواقفنا
كان تراعي لي المكلومه مشاعرنا
وترحم صدق إحساسنا وعواطفنا
ما نحن فاهمنك وأنت عارفنا
كتير بنينا في الخيال أماكن مراتعنا
وهجرنا دنيا الناس منها بعدنا
ولي قصور أحلامنا كم بنينا شيدنا
تتعانق أرواحنا وتتوارد خواطرنا
كنا بنشتل زهور الريد في حدائقنا
زمان كنت بتماسينا وكتير تصابحنا
اليوم جفيتنا حتى السلام منو حارمنا
لو في فراقنا راحتك ده شيء بيفرحنا
ما تفتكر انو هجرك لينا يمكن يعذبنا
ماالشيء البسعدك أكيد بفرحنا
لينا طلب عندك وعارفنك مابتكسفنا
لوفي حقك يوم قصرنا ولا غلطنا
نرجوك تعفو وتغفر تسامحنا
ما قلبك الأبيض هو الكان مصبرنا
وما تنسى عن حالك مرة مرة تطمئنا
ولو قليبك الصافي حن وسألك عنا
بتلقانا زي ما خليتنا يانا نحنا
لا المحن في يوم تقدر تبدلنا
ولا الزمن يقدر يمحو الفي دواخولنا
حتى الظروف مستحيل تقدر تغيرنا